Aeroportet më të afërta janë aeroporti ndërkombëtar “Adem Jashari” - 87 kilometra,  aeroporti “Nëna Terezë” në Rinas - 167 kilometra dhe aeroporti “Leka i Madh” që gjendet në afërsi të Shkupit ku distanca është 120 kilometra.
Përmes rrugëve tokësore, Prizreni ka komunikim në shumë drejtime.
Nga Durrësi, respektivisht nga Tirana, arrihet përmes autoudhës e cila kalon përmes maleve piktoreske të Veriut të Shqipërisë dhe në Tunelin e Kalimashit, që ka gjatësinë më të madhe në Ballkan.
Me Shkupin, Prizreni lidhet përmes Grykës së Lumëbardhit dhe Maleve të Sharrit, e që, në një segment mund të vazhdohet drejt Tetovës, Gostivarit dhe Strugës.
Me kryeqytetin, pra me Prishtinën, tani janë dy rrugë: magjistralja dhe autostrada. Nga kjo pikë kyçe, destinacionet janë të shumëfishta: Nishi-Sofja-Stambolli / Shkupi-Selaniku/ Mitrovica – Beogradi.
Një mundësi e udhëtimit përmes ujit, mbetet dëshirë e brezeve. Është relacioni Kukës- Komon, përmes Liqenit të Fierzës dhe fjordeve shqiptare.